En
solidariedade coas mulleres das asociacións Centinelas e Red Madre.
En
contra da propaganda política do goberno de Santiago de Compostela
Aberta.
O
partido SAIn de Galicia solidarízase con estas dúas asociacións
que veñen de ser vetadas, desprestixiadas e estigmatizadas polo
goberno municipal, a través da Concelleira, Concha Fernández.
Entendemos que este veto argumentouse en base a interpretacións
subxectivas e superficiais sobre a suposta ideoloxía das
asociacións, máis que na realidade do seu papel social, sobre o que
a Concelleira parece ter un grande descoñecemento.
A
rolda de prensa na que se comunicaba á sociedade a non aprobación
dos convenios coas asociacións por traspasar “liñas vermellas”,
celebrouse mesmo antes de recibir a unha delas, Asociación
Centinelas, a cal non tivo coñecemento previo nin puido expresar a
súa opinión, expoñer o traballo realizado ou aclarar o ideario da
asociación.
Entendemos
que unha decisión desta relevancia política sobre unha realidade
que afecta a centos de persoas en situacións moi difíciles, e que
xorde precisamente pola falta de resposta desde as Administracións
Públicas, debe partir dun coñecemento amplo da problemática, das
persoas afectadas e dos servizos que prestan as asociacións. Cremos
que o Concello debera tomar decisións partindo dos feitos e do
respecto pola iniciativa cidadá, antes que deixarse levar por
lugares comúns ou facer tábula rasa ideolóxica.
Ambas
asociacións foron postas en marcha e sostidas con traballo gratuito
de moitas persoas desta cidade, e atenden a centos de mulleres da
cidade, con recursos achegados libre e desinteresadamente por persoas
que as apoian. A aportación de 3.000 euros do Concello non vai ser
determinante para a viabilidade destes proxectos, pero esta pequena
cantidade deu pé a un debate furibundo e manipulado que ao cabo,
resulta una propaganda lamentable.
Sen
entrar ao contido das argumentacións do Concello, lexítimas pero
moi cuestionables, esta decisión non contou en absoluto coas persoas
nin os colectivos afectados. Non é unha decisión que fale dun
goberno democrático, participativo ou aberto. É unha decisión do
poder sobre a sociedade, contra un ben obxectivo: a atención a
moitas mulleres con nenos que están cansas da
ineficacia dos servizos sociais do Concello e buscan axudarse unhas a
outras e ter espazos de compartir o que precisan.
Ao
debate sobre o aborto no que a Concelleira centrou o tema, e que nos
parece de grande interés abordar, tanto as mulleres e familias
afectadas como os responsables e traballadores desas asociacións
teñen moito que aportar, como moitos outros membros da sociedade. A
ese debate estamos dispostos a colaborar, cando Compostela Aberta
queira. Pero desde o SAIn queremos un goberno que impulse o
protagonismo da sociedade e a atención dos problemas dos máis
vulnerables, e non imposicións ideolóxicas desde o poder.
